O RETO dos sábados (despois) 2 e O RETO dos sábados(antes)3 ..Uff...

   

RETO 3 (antes)

Teño que cambia lo nome do choio, porque estoume a enredar  cos RETOS...

Estes marcos son o que trouxen de RETO este sábado 29 30 de xaneiro..., e no que teño que  traballar esta semana... 

O lote completo 15 €

RETO 2 (despois)

O reto desta semana eran as dúas caixas que atopara no lixo camiño do traballo... Unha está con laranxas na cociña, xa saíu na entrada de onte...

A outra, que era, supoño, dunha botella de viño do Porto, tiña pensado usala de mesiña de noite na cama do neno pequeno, pero acabou sendo outra cousa...Mentres facía probas de como colgala sen andar furando todas as paredes, foi o V. que se decatou  que era como unha  casiña coa súa porta corredeira e todo... A verdade e que enseguida tróuxome á memoria un libro que tiña cando estudaba  e que tiven a paciencia de ir buscar por todo-los estantes da casa e que ao fin atopei:

 

O caso é que a nosa casiña modular moderna quedou así :

 

Pero tamén así:

e así:

PD:  Esquecía unha cousa...

Un saúdo María!, se andas por ahí, manifestate!... atopei un comentario teu nunha entrada antigua hai dous dias, por casualidade...non sabía que estaba aí .... 

Ben pode facer 25 anos o mais que non nos vemos!... Levei unha sorpresa e unha alegría ... 
si que eramos cousas pequenas, cando nos coñecinmos, ben pequenas ...

o seguinte xa vai ser a primavera

Hoxe sen previo aviso cambio o aspecto do blogger... Estas cousas sempre desacóuganme... ¿será que me metín nun blogger falso e á vez que escribo estanme collendo datos para facer quen sabe que falcatruadas? Pero pódeme a curiosidade e empezo probar en todos os botonciños... agora sei que podo poñer as fotos pequenas, medianas, grandes e extra grandes, como as pizzas ... a ver como quedan...

Hei de atoparlles sitio...

Cada vez gústanme mais as madeiras das que falei onte... Voulles atopar un sitio como sexa, porque xa está decidido, non vou votalas ó lixo de ningún xeito... De momento gústame como combinan cos paxaros ... Hoxe estiven facendo probas dun arranxo bonito para poñer nun grupo de Flickr e pasei un bo rato... Déronme ganas de poñerme a pintar ... houbo un tempo que era a miña paixón... que foi de todo aquelo?...

A colección do luns

Madeiras atopadas na praia...

Como a unha investigación en curso sobre a colección de anuncios antigos, tiña pensado poñer outro cachiño, para ver si daba pistas... pero colóuseme unha emerxencia.

O P. está moi entretido acondicionando o rocho, (teño a sospeita de que está a montar nel un taller de chapa e pintura de bicis) e hai un tempo que ven e vai, leva e trae... Ten todo ocupado coas bicis e as súas ferramentas ( a verdade é que, xuntando as bicis que funcionan coas reliquias que están para arranxar ... son moitas bicis de Dios) e cousas miñas xa case non quedan, a verdade...

Non sei como foi dar con esta pila de paus que tiña agochada nun recuncho, onde a ninguén molestaba... pero deu. Este fin de semana, a pila de madeira subiu do soto e quedou varada na entrada da casa, cal restos dun naufraxio tralo temporal... Un ultimatum sen palabras... O lle atopo un sitio ou non lle queda moito... Polo menos que quede rastro da súa memoria eiquí...

O reto dos sabados 2. (Antes)

Hoxe estiven a piques de traer de RETO un moble dos anos 50 ao que teño votado o ollo doutras veces, pero, para iso, primeiro teño que facer sitio... (o camiño de RETO é de ida e volta, as veces tamén levo cousas para deixar alí...)

O caso é que hoxe volvín de RETO coas mans valeiras, así que podo adiantar choio atrasado. O reto para esta semana son estas caixas que atopei no lixo de camiño ó traballo hai dúas semanas, un día que choveu a mares ... Entrar con elas pingando, moi digna, no traballo, foi a parte mais difícil... O que resta por facer e ben doado...

O lote completo 0 €


Non podo deixar tampouco de dicir que a miña plantiña floreceu... Tenme abraiada, un día puxen nunha maceta unha faba pinta dun paquete de legumes que merquei en Eroski, a ver que pasaba, e iso é o que teño na casa... agora entendo o do conto das fabas máxicas....

Mira, aí está a faba:

O reto dos sábados, 1 (despois)

Ben, aquí está o reto do pasado sábado 16: Estante: No carto dos nenos, pintado de verde e cheo xa de chilindradas:

Giratutto nº 1: Debaixo do estante vermello, para poder xiralo a gusto do usuario. Este estante, por certo, tamén veu, no seu día, de RETO. Está tumbado para poder gardar os libros mais grandes e as caixas dos xogos de mesa.

Cabaliño de pau: Pois por aí anda, cada día nun sitio. Na foto anterior podese ver alí arrumbado nunha esquina.... A fin de contas, é para andar ó trote con él no? Giratutto nº 2: A procura da súa ubicación definitiva, hoxe debaixo dunha bandexa na cociña:

Lámpada: Pois non sei, votei a lavar a tela branca que tiña posta o mesmo sábado, e a día de hoxe, aínda non a atopei: ou está no burato negro dos calcetíns desparellos, ou dobrada na armario da roupa da casa, na pila dos panos...

Antes:

Estou moi contenta co traballo, mesmo fun quen de colgar o estante na parede sen andar pedindo axuda co taladro...

hoxe

Pos-post: Cando lín a prensa o dia despois, doume a sensación de que a manifestación da que falaban algúns era outra distinta da que fora eu... en fin, longo é o camiño, pero non temos outra...

A colección dos luns

Hoxe teño cita no dentista. Pareceume adecuado á ocasión mostrar (parte da) miña colección de publicidade de produtos farmacéuticos e sanitarios antigos (tamén teño doutros temas...)

Esta é a miña preferida:

Tampouco está mal esta. Está claro que o color do malestar é o verde...

Pd: Logo de face-la foto, atopei traspoleirado este anuncio:

¿ emplastos perforados americanos de fieltro rojo? iso que raio é ?

O Reto dos sábados (antes) 1

Xa comentara moitas veces a miña adición ao rastreo, así que decidín iniciar outra sección oficial do blog, relacionada coas miñas visitas a RETO... unha desas tipo "antes e despois", tamén semanal, como a dos luns..... Non hai como ter unha estrutura e unha rutina para facilitar o traballo... Non é que considere escribir no blog un traballo, é mais ben un momento de disfrute e relax, pero ás veces son un tanto anárquica... así que convén poñer un pouco de orden nas miñas cousas... A verdade é que cada vez valoro mais a disciplina... será porque teño tres rapaces pequenos...

A ver, a idea é mostrar a cousa adquirida, tal e como ven de Reto (tamén vale do lixo ou da cuneta) o sábado, que é cando adoito ir de rastreo, e despois mostrala -na semana seguinte- xa arranxada e integrada na casa na súa posición definitivo-temporal. O "beneficio colateral" desta idea espero sexa non acumular trastos na casa pendentes de ser ubicados e ter os choios ao día... E tamén cortarme un pouco á hora de traer cousas a casa, agora que adquirín o compromiso de mostralas...e remata-lo traballo no prazo da semana... (será mellor darme 15 dias?).

Pode se-lo caso (raro) que non atope nada e volva á casa coas mans baleiras... Nese caso aproveitarei para por ao día cosas que xa teño doutras ocasións, collidas antes de empezar con este o meu...

RETO DOS SÁBADOS¡¡¡

Esta é a colleita do sábado 16 de xaneiro de 2010:

Un cabaliño de pau e trapo, dos giratutto (quen no necesita un giratutto- ou dous- na súa casa?), un estante de madeira e unha lampada ... Todo o lote, 10€

A ver que fago con todo iso...

Seica en Suecia chámase Knut

Hoxe estivemos a desfacer a árbore de Nadal... A verdade é que despois dunha noite de treboada e ventos racheados, veu un día de sol que parecía primavera... A árbore xa estaba dando o cante alí chantada na galería cos seus adornos pendurados...

Así que fora o Nadal e agora, a outra cousa ... Os nenos xa preguntaron cando tocaba troula outra vez. Sen contar o San Valentín, que entre nos ten moito predicamento, non por namorados, senón por ter o 50% dos homes da familia con ese nome, (o outro 50% chámase Pucho), as próximas vacacións son as de carnaval... Os reis magos, moi precavidos, trouxeron este ano un disfrace de pirata (en realidade foron sete, tamén houbo para os curmáns) , co que o tema quedou resolto... O disfrace veu nunha bolsiña, que serve tamén de bandeira pirata, e contén unha badana, un garfo, un parche, un trabuco , un bolso de coiro con moedas (de chocolate) e un loro de trapo cun gancho para levar no hombro...ah, e unha camiseta de raias... Atopar sete camisetas de raias brancas e vermellas en sete tallas diferentes foi, en realidade, a parte mais dificil...

A colección dos luns

Proxecto: A colección dos luns.

Xa comentei algunha vez as miñas sospeitas de adoecer do síndrome de Dióxenes...Todo o gardo, todo me serve... ata as etiquetas da roupa (si son bonitas) . O conservo porque me gusta ou porque penso que podo darlle algunha utilidade algún dia ( e penso que é bonito) ou porque me lembra calquera cousa(e paréceme bonito) ...... que sei eu..

O caso e que levo anos acumulando moreas de cousas que gardo revoltas e misturadas, que cando as busco, xamais atopo, e que así amontoadas perden aquela chispa de interese que nun principio me incitou a conservalas...

Como tantas outras veces, ollando no flickr de Lisa Congdon, atopei inspiración para afrontar o tema e darlle sentido a todas esas pequenas cousas que fun xuntando cos anos, un traballo que tiña pendente dende hai tempo.

Neste blog explica ela o seu proxecto, dun xeito que subscribo e aplico integramente a esta miña primeira "Sección oficial" no meu blog. A única diferenza é que eu non penso debuxar nin pintar ningunha colección imaxinaria, limitandome a rexistrar aquelas cousas que teño na casa, e que o farei semanalmente e non diariamente ( non porque non teña cousas a moreas, senón porque sospeito que son mais preguiceira que ela).

Así, a partir de hoxe, e durante todo o ano, cada luns fotografarei unha das miñas coleccións (ou parte dela) de xeito que quede rexistrada nunha forma que me convenza, e teña senso para mí. Espero, como beneficio colateral deste rexistro, ser capaz de mante-lo orden e atopar un sitio na casa para cada colección , ou ben quedar mentalmente libre para desfacerme dela, de se-lo caso.

Pareceume boa idea comezar pola miña colección de entradas e demais merchandising dos concertos e outros eventos de Remolcamadriña, que fun conservando desde aquel memorable primeiro concerto... Non sei si están todas as que son, pero son todas as que están. Por certo, do último concerto non teño entrada houbo?

(Desta colección non penso desfacerme en ningún caso!)

neve

Esta mañá estaba todo nevado... A xente camiñaba como autómatas a cámara lenta, para non esvarar... Todos comentaban que hai anos que non nevaba en Santiago, pero eu sei que o mesmo dia do ano pasado, o vernes despois de Reis, tamén nevou. E eu volvo pensar que o ano novo comeza ao redor do dia 8... e que estou desexando cumprir todos os meus propósitos para o ano que bota andar!